Seicotherapi Datblygiadol Dyadig Lefelau 1 a 2

Hyfforddiant mewn Ymyriadau Seicolegol a Rhianta Therapiwtig gyda Phlant a’r Glasoed â Phroblemau Ymlyniad Trawma a’u Teuluoedd

Mae AFKA yn gweithio ar y cyd â Rhwydwaith DDP y DU i redeg cyrsiau DDP Lefel 1 a 2.

MaeLefel 1 yn hyfforddiant rhagarweiniol 4 diwrnod ar Seicotherapi Datblygiadol Dyadig, model ymyrraeth ar gyfer teuluoedd â phlentyn sydd â phroblemau ymlyniad trawma, a ddatblygwyd gan Dan Hughes, Seicolegydd Clinigol, UDA. Yn yr hyfforddiant hwn, mae theori ac ymchwil ym meysydd trawma datblygiadol, datblygiad plant a theori ymlyniad wedi’u hintegreiddio i gynhyrchu ymagwedd therapiwtig a model magu plant a ddefnyddir ar gyfer datblygu perthynas a datrys trawma. Mae DDP yn cydnabod y rôl hanfodol y mae rhieni mabwysiadol a gofalwyr maeth yn ei chwarae fel ffigurau ymlyniad sylfaenol yn adferiad plant sydd wedi’u trawmateiddio ac sy’n gwrthsefyll ymlyniad.

Cyflwynir yr egwyddorion a’r ymyriadau trwy gyflwyniadau ffurfiol, trafod, tâp fideo o sesiynau, chwarae rôl a thaflenni.

Amcanion
Erbyn diwedd y cwrs hwn bydd cyfranogwyr yn deall:

• Effaith ymlyniad datblygiadol diogel ar ddatblygiad niwrolegol, affeithiol, gwybyddol ac ymddygiadol
• Sut mae trawma datblygiadol (cam-drin ac esgeulustod) yn creu patrymau ymlyniad ansicr a di-drefn sy’n rhwystro datblygiad arferol
• Egwyddorion seicotherapi gyda phlant a phobl ifanc sy’n hwyluso datblygiad diogelwch ymlyniad ac adferiad wedi trawma datblygiadol
• Strategaethau penodol rhianta sydd yn hwyluso diogelwch ymlyniad ac yn cynorthwyo rhoddwyr gofal i helpu plant i wella o effaith trawma datblygiadol

MaeLefel 2 yn gwrs 4 diwrnod sy’n agored i’r gweithwyr proffesiynol hynny sydd wedi ymgymryd â’r hyfforddiant Lefel Un 4 diwrnod ar gyfer Ymarfer Datblygiadol Dyadig a Seicotherapi (DDP). Mae Seicotherapi Datblygiadol Dyadig yn fodel ymyrraeth a ddatblygwyd gan Dan Hughes, Seicolegydd Clinigol, UDA.
Mae’r ymagwedd hon yn helpu gweithwyr cymdeithasol, seicolegwyr clinigol, therapyddion ac ymarferwyr eraill i ddeall a chynorthwyo plant, pobl ifanc a’u teuluoedd yn effeithiol. Yn y model hwn, mae theori ac ymchwil ym meysydd trawma datblygiadol, datblygiad plant a theori ymlyniad wedi’u hintegreiddio i gynhyrchu ffordd o weithio sy’n helpu gyda datblygu perthynas a datrys trawma. Mae DDP yn cydnabod y rôl hanfodol y mae rhieni mabwysiadol, gofalwyr maeth, gweithwyr preswyl a gweithwyr cymdeithasol yn ei chwarae yn adferiad plant sydd wedi’u trawmateiddio, sy’n gwrthsefyll ymlyniad.

Amcanion:

• Cael dealltwriaeth ddyfnach o theori ac ymarfer yr ymyriadau a’r egwyddorion rhianta a ddefnyddir yn yr ymagwedd hon ac a gyflwynwyd yn DDP Lefel Un
• I bob cyfranogwr gael cyfleoedd i ganolbwyntio ar y llwyddiannau a’r rhwystrau y maent wedi’u profi wrth weithredu’r model yn eu hymarfer . Disgwylir y bydd cyfranogwyr yn dod ag enghreifftiau o’u gwaith eu hunain i’w trafod, megis trwy astudiaethau achos a/neu recordiadau sain neu fideo
• Darparu cyfle i gyfranogwyr archwilio (mewn grwpiau bach o 3) sut y gall eu profiadau ymlyniad eu hunain lywio eu gwaith ac effeithio arno.
  Bydd cyfranogwyr yn cael cyfle i dderbyn ymgynghoriad am eu gwaith. Y gobaith yw bod pobl wedi gallu recordio sain neu fideo eu gwaith i gael ymgynghoriad uniongyrchol gan ddefnyddio clipiau. Os nad yw hyn yn bosibl, gwneir hyn trwy drafod achos a/neu ddefnyddio ymarfer ar waith, gyda chyfranogwyr yn cymryd rôl plentyn, rhiant neu ymarferydd.
• Yn ystod y 4 diwrnod, bydd ymarferwyr yn cael cyfleoedd i ddatblygu eu sgiliau ymhellach yn y maes gwaith hwn gan ddefnyddio’r ymagweddau hyn yn ogystal â thrafod gwaith maent yn teimlo sy’n mynd yn dda a gwaith lle maent yn teimlo’n sownd. Bydd Julie Hudson, yr hyfforddwraig, yn teilwra’r cwrs i ddiwallu anghenion hyfforddiant ymgynghori a sgiliau’r grŵp.

Pwy ddylai fod yn bresennol?
Mae’r hyfforddiant yn berthnasol ac yn agored i therapydd ac ymarferwyr sydd â phrofiad o weithio gyda phlant a phobl ifanc sydd â phroblemau ymlyniad trawma a’u teuluoedd maeth, mabwysiadu neu eni. Mae hyn yn cynnwys, er enghraifft, Seicolegwyr Clinigol ac Addysgol, Therapyddion Galwedigaethol, Therapyddion Chwarae, Therapyddion Celf, Seiciatryddion, Gweithiwr Cymdeithasol a Gweithwyr Cymdeithasol Gofal Preswyl.

Mae croeso i Rieni Mabwysiadol a Gofalwyr Maeth fynychu gyda’r ddealltwriaeth bod yr hyfforddiant yn canolbwyntio ar sut i ddarparu gwasanaethau i blant a’u teuluoedd. Nid yw’n briodol ystyried yr hyfforddiant hwn fel dewis arall neu ychwanegiad at wasanaethau cymorth mabwysiadu, cymorth rhianta neu ymyrraeth therapiwtig y dylid ei darparu yn ardal leol y rhiant neu’r gofalwr maeth.